Årets lag-VM i squash er avlyst fordi vertslandet Malaysia nektar Israels lag å reise inn i landet.
Det opplyser Det internasjonale squashforbundet (WSF). Turneringa for menn skulle blitt avvikla frå 7. til 12. desember i hovudstaden Kuala Lumpur.
President i WSF, Zena Wooldridge, opplyser at forbundet har prøvd å påverke styresmaktene i Malaysia for å sikre at også Israel får delta.
Det er fleirtal av muslimar i Malaysia. Der er det generelt sympati for palestinarane i konflikten med Israel.
I 2019 blei Malaysia fråteke VM i svømming for parautøvarar fordi styresmaktene trua med å nekte innreise for utøvarar frå Israel.