Marco Rose (45) blir henta inn som ny hovudtrenar i RB Leipzig. Hans første kamp i jobben skjer med gamleklubben Borussia Dortmund.
Bundesligaklubben stadfesta tilsetjinga torsdag. Dagen før fekk Domenico Tedesco sparken etter ein svak start på sesongen.
Rose, som er fødd i Leipzig, har fått ein kontrakt til sommaren 2024. Han har tidlegare trena Erling Braut Haaland i både Salzburg og Borussia Dortmund. I tillegg leidde han Borussia Mönchengladbach i nokre sesongar.
Sist sesong vart Roses einaste i Dortmund. Han tok klubben til ein klar 2.-plass i ligaen, men fekk ikkje halde fram i jobben. Laurdag tek RB Leipzig imot nettopp Dortmund.
I Bundesliga står Leipzig-laget med fem poeng på fem kampar. Det held til ein 11.-plass. Tysdag vart det 1-4-tap heime mot Sjakhtar Donetsk i Meisterligaen.