Henning Berg rosar Mauricio Pochettino som han meiner bør vere ein av kandidatane til å erstatte Ole Gunnar Solskjær i Manchester United.
Det seier den norske Omonia-trenaren til BBC. Berg har sjølv spelt for United saman med Solskjær.
– Du ser kva han (Pochettino) gjorde i Southampton og Tottenham. Han tok over og utvikla spelarane og laga. Dei spelte god fotball, seier Berg.
– Men det er eit stort «men», og det er at han ikkje vann noko. Han hadde kanskje lag som ikkje var gode nok til å vinne til slutt. Han har vist at han er ein toppmanager, og han bør heilt klart vere ein av kandidatane.
Pochettino blir i mange britiske medium nemnd som favoritt til å bli permanent United-manager. Måndag rapporterte fleire at argentinaren skal vere interessert i jobben sjølv om han framleis har kontrakt med PSG.