Noregs kvartett i curling-VM for blanda lag tapte for første gong i meisterskapen då Sverige vart for sterke med 7-3-siger.
Etter at laga låg likt etter fire omgangar, slo svenskane til med heile fire poeng i den femte omgangen. Dermed hadde det norske laget ein svært utfordrande jobb framfor seg. Dei slo tilbake med eitt poeng i neste omgang, men då Sverige fekk poeng i omgang sju, gav Noreg opp.
Med det står Noreg framleis med fem sigrar. Sverige leier gruppa med seks sigrar og styrer mot kvartfinalebillett. Noreg skal truleg spele utslagsrunde om kvartfinaleplass.
Japan og Tsjekkia ventar før gruppespelet er over torsdag. Utslagskampane i VM blir avvikla fredag og laurdag.
Det norske laget består av Pia Trulsen, Christoffer Svae, Maia Ramsfjell og skip Alexander Lindström.