José Mourinho nekta å svare på spørsmål etter Romas 1-2-tap heime mot Milan søndag. Det gjorde han for å unngå å snakke på seg ei utestenging.
– Gratulerer til Milan. Eg vil ikkje seie noko meir enn det, for elles er eg ikkje på trenarbenken neste veke, sa Mourinho til DAZN.
På pressekonferansen sa han at Roma-fansen og klubben ikkje fekk den respekten dei fortener. Han forlét podiet før nokon rakk å stille han spørsmål.
Mourinho opplevde søndag å tape heime i Serie A for første gong. Rekkja stoppa på 43 kampar, der dei 38 første var frå hans tid som Inter-trenar mellom 2008 og 2010.