Viktor Hovland greidde så vidt ein runde på par etter å ha slite med upresise utslag i første runde av US Open.
Utslaga er normalt ei av Hovlands sterke sider, men torsdag hamna ballen hans i roughen like ofte som på fairwayen. Hadde det ikkje vore for ein sterk birdie på siste hol, ville han enda med ein runde over par.
Fasit for første runde blei fire birdiar og like mange bogeyar.
Hovland, rangert som nummer åtte i verda, opna runden på det jamne og hadde par på dei tre første hola. Deretter følgde fire hol med vekselvis bogey og birdie.
Hovland kom seg under par for første og einaste gong med birdie på det niande holet. Det neste holet enda med bogey, og dermed var han tilbake på par.
På 13. hol hamna utslaget i roughen inntil eit tre. Han måtte tole ein ny bogey og fall på listene, men han klatra igjen då han avslutta runden med birdie. Han ligg på 25.-plass.
Ingen er så langt betre enn fire slag under par, så det er ikkje langt fram.