Karoline Bjerkeli Grøvdal kom på 5. plass og tok personleg rekord med tida 30.41,66 på 10.000 meter under Bislett Games. Det er ny personleg rekord.
– Eg er fornøgd, det er jo pers, men eg er litt sånn tung i beina i starten, seier Bjerkeli Grøvdal til NRK.
Yenawa Nbret vann løpet med tida 30.28,82.
Bjerkeli Grøvdal måtte sleppe teten med rundt 4000 meter att og var sjanselaus på sigeren.
– Eg må få i gang beina. Eg kjenner leggane strammar seg, så eg er godt fornøgd. Eg skulle gjerne følgt det grøne lyset, men eg safet nok litt.
Bjerkeli Grøvdals tidlegare personlege rekord på distansen er 30.50,84.
Noregsrekorden for kvinner er på 30.13,74. Den blei sett av Ingrid Kristiansen på Bislett i 1986. Den gong var det verdsrekord.
– Det er ikkje så enkelt å sette noregsrekord når den er såpass god som den er. For det er ikkje så mange i Europa som spring så fort, seier Kristiansen til NRK.
Agnes Ngetich har den noverande verdsrekorden med tida 28.46 på distansen. Den blei sett i eit gateløp i Valencia i 2024.